恐懼只係前菜
上回我哋講咗攻擊者點樣利用「恐懼」、「時間壓力」同「稀缺感」呢啲基礎生存本能，去觸發Amygdala Hijack（杏仁核劫持），令你嘅理性思維暫時 offline。如果對方再識玩啲，唔單止會嚇你，仲有其他方法令你乖乖聽話。歡迎嚟到第二層：社會本能(Social Instincts)。
攻擊嘅你「社交腦」：Belongingness（歸屬需求）+ Esteem（尊重需求）
根據 Maslow 需求層次理論，當人滿足咗「安全需求」，就會追求被接納、被尊重、群體歸屬感，呢個就係我哋嘅「社交腦」。人天生傾向相信權威、融入群體、回報善意。呢啲特質令文明得以建立，但同時亦預留咗一堆可以被利用嘅心理「預設值」。
作家George MacDonald 講過：To be trusted is a greater compliment than to be loved，信任本身就係一種好強嘅「獎賞」。神經經濟學家 Paul Zak 發現，當人收到「信任」訊號時，大腦入面嘅Oxytocin（催產素）水平會上升，令你更願意合作、放低戒心。換言之，我哋個腦本身係「想」去信人，因為信任會帶嚟愉悅感同連結感。攻擊者就係利用呢種天性，將信任變成武器。
信任武器庫：權威偏差 (Authority Bias)
點解權威咁有效？人類社會係圍繞權威建立，心理學叫 Authority Bias（權威偏差）：人會不自覺地對權威嘅指令傾向服從。呢個唔係智商問題，而係服從權威可以節省你做判斷嘅認知資源。遠古時代，聽從部落首領通常係最安全同最快嘅選擇。「服從權威」亦寫入咗我哋嘅本能。但網絡世界，權威係可以偽造嘅，而且殺人於無形。
Business Email Compromise（BEC，商業電郵詐騙）係一種針對企業嘅社交工程攻擊。他們會偽冒（或者盜取）企業帳號，發出看似合理但實際係有惡意嘅請求，進行攻擊，再加上 Deepfake，權威嘅說服力進一步升級。
2024年初，香港一間跨國公司嘅財務職員收到一個睇落正常嘅 video call 邀請。職員一開始有懷疑，但入到會議，畫面上有CFO同幾位高層，全部對到聲、對到樣。CFO要求就機密交易分多次轉帳，見到「熟口熟面」嘅管理層喺齊度，傾向相信要求屬實。結果短時間內完成 15 次轉帳，合共約二億港元，事後先證實成個 call 都係 deepfake，畫面同聲音全部由 AI 生成。攻擊者利用公司網站、訪問等公開資料訓練模型，做到即時互動同自然表情。當「權威」結合「真實感」，人嘅大腦更容易自動假設唔需要再驗證。研究亦顯示，當「權威」同「時間壓力」同時出現，服從率會明顯上升。
信任武器庫：互惠原理 (Reciprocity)
點解「幫你」會成為武器？心理學家 Robert Cialdini 喺《Influence》入面提出六大說服力原則，第一條就係 Reciprocity（互惠原理）。簡單講：人天生唔鍾意「欠人」。當別人俾咗好處你，你自然會想還。呢套機制喺正常社交係好事，因為鼓勵合作。但一旦被寫入騙案劇本，就會變成可預測同可重複利用嘅攻擊手段。
近年唔少騙案，都有類似模式：先用恐懼開局（話你涉及洗黑錢、詐騙案），令你情緒崩潰，之後「公安」話可以幫你查清楚，甚至好有耐性教你點樣操作「保證金」、「安全帳戶」。你覺得自己「被幫緊」，信任唔再只係基於對方身份，而係基於一種情感：「如果佢係呃我，點解要用咁多時間？」
呢個就係一種 Trust Transference（信任轉移）：你將「對方付出」當成「對方值得信任」嘅證據。當對方話：「跟我指示，將錢轉去指定帳戶。」你已經唔係單純「聽命令」，而係覺得自己「配合同一個幫緊你嘅人」。問題就係：呢套互惠機制，本身就係俾人寫入劇本，精準利用。呢個唔係你太天真，而係一個本來用嚟維繫人際關係嘅心理機制，被反轉嚟用。
信任武器庫：社會證明 (Social Proof)
點解「人哋都咁做」會令你放低戒心？當人唔確定點做先啱嘅時候，會參考其他人點做。呢個就係 Social Proof（社會證明），又或者叫「從眾心理」。喺高不確定性環境，觀察群體行為係一種有效嘅「捷徑」。平時出街食飯，邊間多人排隊就覺得應該會唔太差。攻擊者知道，Social Proof 係可以偽造嘅。
假投資 App 下面通常有好多好評，甚至有專家名人代言（當然可以又係 Deepfake）。當你見到咁多「人」，你嘅大腦會自動降低風險評估，出現：「咁多人都得，應該唔會輪到我出事。」但背後，其實只係「群體決策」稀釋咗個人責任感。再進階少少，攻擊者會先 hack 熟人帳號，再出post。見到係熟人 post 嘅，你自然連果少少懷疑都冇埋。呢一刻，Social Proof 已經同 Authority（你對朋友嘅信任）疊加咗。
你最大嘅敵人，其實係你自己
三種武器，指向同一個核心：將原本應該「先驗證後行動」嘅步驟，改寫成「直接信任再行動」。權威令你覺得唔應該質疑，互惠令你覺得唔好意思拒絕，社會證明令你覺得唔好唱反調。但可惜，呢啲都未必係攻擊者嘅終點。
下一次，我地會拆解：Self-Actualization（自我實現需求）。「好奇心」點樣害死貓？點解喺騙案入面，受害人會愈輸愈深，仲會說服自己：「再入多一次，應該可以返到轉頭」？Cognitive dissonance（認知失調）同 sunk cost effect（沉沒成本效應）點樣被系統性利用？呢一刻，攻擊者已經唔需要再呃你，因為你已經開始親手說服返自己。
Leave a comment