信任係雙刃劍
上一次，我哋見識過攻擊者點樣利用「權威」同「互惠」令你聽話。但去到最後一層，攻擊者嘅目標唔再係令你「被動受騙」，而係令你「主動參與」。歡迎嚟到 Social Engineering 嘅極致，令你成為騙局嘅共犯。
Maslow 頂層：Ego 養出嚟嘅心魔
當基本需求滿足晒，人就會想證明自己嘅獨特價值，追求 Self-Actualization（自我實現）。唔只係搵食，而係想證明自己係「有能力」嘅人。呢一層，好多中產、專業人士自問 judgment 唔錯，騙徒就由呢度落手，表面讚你，實際係餵大你「我唔會睇錯」嘅故事。當你開始自我澎漲，你投資嘅唔淨係錢，仲包括你個「聰明人」身份。每一次加碼、對銀行職員圓謊、鬧屋企人「你哋唔明」，都已經唔再係單純為個「投資計劃」，而係為咗保護呢個自我形象。人越聰明，就越相信自己嘅判斷。攻擊者唔係要打敗你嘅智商，而係要「利用」你嘅智商去幫佢圓謊。
心魔（一）：好奇與優越 聰明人嘅死穴
大腦好憎「未完成」嘅狀態，心理學叫 Curiosity Gap（好奇缺口）。 但對好多自問「有研究」嘅人嚟講，更有殺傷力嘅，其實係 Information Advantage（資訊優勢）嗰種「我知嘅嘢，普通人唔知」嘅快感。以下嘅案例，大家都似曾相識（有研究做過）：公司門口「突然」出現一隻寫住「裁員名單」、「董事會文件」嘅 USB，實驗入面好多人會插落公司電腦度睇，原因唔淨係好奇，仲有「第一個知內幕消息」嘅優越感。呢種「我知、其他人睇唔通」嘅感覺，令你將自己進一步推向深淵。
心魔（二）：承諾與一致 令你一試再試
當我哋做咗一個決定，就會搵盡理由去證明嗰個決定係啱嘅。Cialdini 喺說服研究入面提過一條好關鍵嘅原則：Commitment & Consistency（承諾與一致性）。人一旦做咗一個決定，特別係講咗出口或者寫咗落去嘅決定，就會有好強嘅壓力，想令自己之後嘅表現同之前保持一致。
好多殺豬盤就係用一連串小決定，慢慢將你推前幾步。頭幾次可能只係一千幾百，當試水溫。之後你可能試多幾次、一萬、兩萬，每次「出數」都支持緊你嘅決定，令你對自己更有信心。再行落去，未必去到幾十幾百萬，但你好可能已經同朋友、同事「分享」過，每一步都增加咗你「要維護之前判斷」嘅壓力。當金額開始變大，如果呢個時候承認中伏，唔只係錢冇晒，仲要承認之前嗰啲分享、推薦、堅持，都係錯誤判斷，呢種打擊係唔係人人受到，所以好多人會「死頂多陣」，寧願再拖耐啲、再搏多鋪。
為咗維護呢個「人設」，你甚至會主動無視警告。當銀行職員問你：「識唔識對方？」你會答：「識，係朋友。」呢一刻，你已經為咗維護自己嘅一致性，主動幫騙徒講大話。
心魔（三）：創傷連結 斯德哥爾摩式情意
點解有啲受害者會為騙徒護航，甚至鬧警方、鬧家人？呢種狀態，喺心理學上好接近 Trauma Bonding（創傷連結）：即係受害者同加害者之間，喺反覆傷害， 加上偶爾好處之下，建立咗一種扭曲嘅情感依附。好多人熟悉嘅 Stockholm Syndrome（斯德哥爾摩症候群），其實就係創傷連結嘅一種極端例子。
騙徒會刻意將你孤立 ，當全世界都反對你，得騙徒一個「支持」你，人可能會產生錯覺：騙徒先係盟友，其他人係敵人。再加上時而對你好（噓寒問暖），時而對你差（突然失蹤）的 Intermittent Reinforcement（間歇性強化）行為，令你喺情緒過山車入面上癮，好似賭博咁期待下一次「回暖」。當家人、警方、銀行職員出現，你就可能會覺得佢哋「否定我之前所有付出」。有關創傷連結嘅研究提出過，受害者往往會將權威／第三者視為威脅，而反而覺得加害者先係唯一理解自己的人。呢一刻，你已經唔係單純為佢哋辯護，而係為保障一段自己好辛苦維持住嘅關係。
心魔（四）：認知失調 大腦嘅自我欺騙
當現實（錢攞唔返）同信念（我無做錯）發生劇烈衝突，大腦會產生 Cognitive Dissonance（認知失調）。為咗減低痛楚，大腦會本能作自我保護：即使要扭曲現實，都要盡量維持嗰個「我無錯」嘅故事。
再加上 Sunk Cost Bias（沉沒成本偏誤），人係會將「已經用咗、攞唔返」嘅成本放大，之後做決定嗰陣，唔係睇而家是否合理，反而被「之前付出咗幾多」綁死咗。明知條路已經唔啱，但因為之前嘅付出，出現「如果而家停，就代表之前全部都白費」嘅諗法。於是死都唔想「就咁算數」，反而更傾向「再投多啲」去證明自己當初冇揀錯。
理智上你知道係無底洞，但心理上，承認受騙嘅痛苦（自我否定）大過金錢損失。為咗保護脆弱嘅自尊，受害者寧願相信一個荒謬嘅謊言，都唔願面對殘酷嘅真相。你用你自己嘅智商去幫騙徒修補劇本嘅漏洞。你唔止係被呃，仲主動參與緊呢場欺騙自己嘅遊戲。
承認脆弱 先係最強
Social Engineering 防不勝防，因為佢攻擊嘅係人性，我哋嘅恐懼、我哋嘅善良、我哋嘅驕傲。很可惜，人腦唔係電腦，冇得落 patch，但你可以做一樣嘢：Awareness（覺察）。當你覺得驚、覺得「唔好意思」、或者覺得「好威」嘅時候，停一停、深呼吸。承認自己會被情緒影響，承認自己有盲點。只有當你放低「我唔會咁蠢」嘅自尊，你先能夠真正睇穿攻擊者嘅劇本。
唔好做自己嘅敵人，唔好做騙徒嘅共犯。
Leave a comment