聖誕節要解放雙手(Part 1)：n8n 係乜？

聖誕節解放雙手，拆禮物重要啲。

聖誕節有咩野做？屋企人食大餐、拆禮物、追劇？我就繼續對住隻 Mon。做野？唔啦！

返工就話啫，而且返工有時都幾悶，成日都要重複：收到 Email 要入 Folder、WhatsApp 有人約手動落 Calendar、（下刪數百字）。有啲朋友甚至放假都冇停手，其實呢啲野，係可以交俾自動化工具搞掂，例如 n8n。

n8n 係乜？同 ChatGPT / Poe 有咩唔同？

n8n 全名係 Nodemation，即係 “node”+”automation”。始創人 Jan 都覺得唔好記，所以畀左 n8n (n+8個字母+n) 呢個名佢，簡短易記。n8n 嘅核心思維，就係用一粒粒 node（節點）完成自動化。每個 node 代表一個動作或者邏輯，將佢哋串連起，就變成一條完整嘅 workflow automation。

可能你會問：「而家有 ChatGPT / Poe，我叫佢幫手做嘢咪得囉，洗乜用 n8n？」好問題。但其實兩者係唔同種類嘅工具，用一個比喻會容易明：

ChatGPT / Poe 係「聰明家丁」：你每次都要「叫佢」，佢先做野。佢好醒目，識得幫你寫嘢、提供建議，但你唔叫佢就唔會郁。

n8n 係「勤力管家」：教識左個「管家」，之後自己識自動自覺叫「家丁」做野。你只需要設定一次規則，之後佢就會 24/7 自動監察、自動叫「家丁」做野 。

n8n 難唔難用？三個核心概念

想用 n8n，你只需要識三樣嘢：你想「管家」幾時做、做啲咩、同幫你分流。
假設你係 freelancer，聖誕前後 Email / WhatsApp 查詢多到爆。人手做法可能係：收到查詢 → 打開睇 → 係咪要報價 → 手動覆 →（可能要）Seve低客資料 → 記低要跟進。搞到聖誕都冇得放鬆。用 n8n 就可以咁教「管家」：

幾時做？Trigger（觸發點）收到新 Email，而包含「查詢」或「報價」就做野。

做啲咩？Action（動作）收到查詢之後，做三件事​（每件事都係一粒獨立嘅 node）
第一件：覆客（「多謝有關XXX查詢，我會盡快回覆」）
第二件：三日後喺 Telegram 提我（「記得 follow up 客戶 XXX」）
第三件：如果係新客，將客名、Email 寫入去 CRM / Excel

幫我做判斷？Logic / Control（邏輯分流）正如唔係新客就唔好再入CRM​，唔係所有查詢都一樣回應，管家要識得睇情況分流。

成個 n8n 體驗，就好似你喺白板上畫流程圖，只不過呢個流程圖係會自己郁、自己幫你做埋。你只需要砌一次，之後每次有查詢，n8n 就自動幫你做晒。

點解要揀 n8n？近來仲話有漏洞添！

漏洞轉頭再講，先講揀佢嘅原因，睇下你中邊樣（或者全中）：

本身唔識 code 用得，識 code 又得，得左！n8n 嘅 User Interface 好清晰，大部分簡單 workflow 根本唔使寫 code。但如果你識少少 Coding（可以慢慢學），每個 node 都可以用 expression 處理、或者直接駁 AI 應用。​

唔想畀咁多錢 n8n 可以免費起步！有更易用嘅工具，但聽完收費模式，我都唔想用：按 Task 收費。用返上面例子「收 Email → 覆客 → 入 Excel → 發 TG」，一封 Email 已經收你四次錢。​n8n self-hosted 裝喺自己部 VPS（幾十蚊港紙一個月），跑幾多個 workflow、幾多次執行，通通無上限。即使用官方 cloud 版，收費都係按「active workflows 數量」，唔係按 Task 次數 。​

唔識用易搵教學、有漏洞 fix 得快！n8n 係 Fair-code（接近開源）嘅項目 。有問題可以上 Forum 問。全球幾萬個人一齊睇住，有 bug 或安全漏洞，住新速度好快。你甚至可以自己做 Customization 。高透明度同社群支援，係好多人信任 n8n 嘅原因。​

無論你識唔識 IT，只要唔介意學、想玩得安心、又想抵玩，n8n 基本上無對手。

講返漏洞：咩係 CVSS？點解要 Update？

你可能見到啲人，包括我 Linkedin，或者新聞，有時會話：「某系統出現高危漏洞，CVSS 幾多分」，跟住就叫人 update。到底 CVSS 係咩？點解成日叫人快啲？CVSS (Common Vulnerability Scoring System)係一套全球通用，用嚟評分「漏洞幾危險」嘅標準 。分數越高，代表越危險，要優先處理。​好似打風咁 ：​

低分（0.1-3.9 | Low）：一號風球，留意下就得
中分（4.0-6.9 | Medium）：三號風球，要開始收衫、睇吓窗
高分（7.0-8.9 | High）：八號風球，真係要處理、唔好出街
極高分（9.0-10.0 | Critical）：九號、十號風球，唔處理隨時玩完

對大部份用家嚟講，未必使記太多 technical 細節，實際啲：見到同自己用緊嘅產品有高分漏洞（尤其係接近「critical」級別），官方又出咗新版本「修補咗安全問題」，就盡快搵時間 update，之後就可以安心繼續玩。

n8n 最近爆咗個咩漏洞？咁會唔會好危險？

最近 n8n 就有一個高危漏洞，CVSS 評分去到 9.9（接近滿分）。簡單講，如果有壞人 login 到個 n8n（或者你唔小心開左道門畀人），佢可以好簡單就跳出 n8n 個框框，直接控制成部機。​好似 n8n 呢種「管家」，本身就握住好多權限叫「家丁」做野。一旦被入侵，風險就可能唔止係 System Down一陣，而係畀人控制成個網路。​

點樣保護自己？官方已經快速推出修補版本，提醒用戶盡快更新。唔駛你驚到唔敢用，而係用一個好簡單嘅習慣，定期更新同唔亂開 public access，換一個更安全又慳力嘅生活。​正正因為 n8n 係開源社群，有漏洞出現，全世界幾萬個 developer 一齊望住，修補速度極快。呢個就係開源嘅好處。

下一篇：由零開始，安全試玩 n8n

下一篇，我會由零開始同你一齊摸索。首先要決定用 cloud 版定 self-hosted 版，兩者都有優缺點，我會幫你揀最啱自己嘅。然後，我會教你點樣用唔洗請 IT 幫手，自己黎都得。

到時你會明白：電腦返工，你去玩，呢句話係真嘅。