聖誕節要解放雙手(Part 2)：3分鐘請管家

上次我哋講過，n8n 係一個 24/7 幫你做嘢嘅「數碼管家」。已經有朋友問我：「Eric，但我唔識 IT，得唔得？難唔難裝？」試玩都要裝？唔好啦！n8n 其實可以唔洗安裝，仲有 AI 教埋你玩 Workflow！我哋會用最簡單嘅方法帶你入門，無需打 code，註冊個 Account 就即刻玩得。

Cloud（唔洗裝版）同 Self-hosted（要裝版）點揀？

是咁的，我想請管家，都要畀地方佢住，n8n 都唔例外。

如果你係完全新手、想快啲有得用、唔介意駛少少錢，Cloud 版絕對係快靚正。佢最大嘅賣點係零安裝零維護，好似開 Gmail 咁，註冊完就用得。而且有 14 日免費試用，夠你試玩 AI 助手、進階 nodes、同埋　workflow library 。​最正嘅係，而家 Cloud 版仲有最新嘅 AI 功能。你可以用叫 AI 幫你砌埋 workflow，唔洗自己逐個 node 研究點連。對於第一次玩嘅人嚟講，一個字：爽！

當然，Cloud 版都有代價。試用期過咗要畀月費，廿蚊美金，唔算貴。而且你啲 　data 會存喺官方 server，如果你對私隱有要求，呢個可能係考慮因素。​

如果你想再慳錢啲，或者鍾意 DIY，Self-hosted 就係你嘅歸宿。Community 版功能齊全，而且完全免費，無論你跑幾多個 workflow、幾多次執行，都係零成本 。所有 workflow、credentials、執行記錄全部喺你自己 server，唔經第三方。​你甚至可以自己改 source code 加功能，但代價係你要自己負責安裝、定期 update（記得之前嘅安全漏洞？）、同埋基本維護。對於唔熟技術嘅人嚟講，呢個可能要啲時間學。​

我建議第一次玩嘅朋友，由 Cloud 版開始。點解？因為你可以用 14 日試用期專心學 workflow 邏輯，唔洗分心。等你玩熟咗、確定長期會用、而且想慳錢或者處理敏感 data，先考慮轉去 Self-hosted。今日我哋都會用 Cloud 版示範。

註冊 n8n：快過煮杯麵

同大家講對唔住先，我 Fake 左大家，標題話3分鐘請管家，實測唔駛，去片！https://youtu.be/Z1Iy4WFXwAQ 而且佢好好，會問啲基本問題，等佢知你想睇咩。其實可以唔答，有一條問 Coding 野，我直接唔揀，Coding 唔係度講​。而大家好快就見到管家工作台：

用 AI 砌你第一個 Workflow

今日我哋做一個超實用嘅例子：每次收到重要 Email，就自動用 AI 搵重點，然後發去你嘅 WhatsApp。呢個場景啱晒啲成日收好多 Email 嘅 Freelancer、Sales、PM。你可以放假去玩，有重要 Email 管家就會自動通知你，仲會幫你睇晒重點。我哋有兩招，一招用 AI 幫手（快），一招手動砌（學）。

第一招：用 AI 幫手砌 Workflow

n8n 最新嘅 AI 功能令你唔洗知每個 node 點用，淨係講你想要乜就得。撳介面中間個 “Build with AI” 按鈕，喺右邊個 prompt 欄打：「當我收到新 Email ，就幫我摘要內容重點，然後發去我嘅 WhatsApp」，然後㩒制。

AI 會自動幫你砌好成條 Workflow，你會見到五個 nodes 已經連埋：監察新 Email、設定規則、用 ChatGPT 做Summary、WhatsApp nodes 通知你（同埋你老細）。​最正嘅係，n8n 唔會唔理你。你會見到右邊有個清單，列晒所有未完成嘅設定你只需要 Click 落去，佢會教埋你點做。

例如撳「Gmail Trigger credentials」，佢會帶你去 Google 授權畫面，撳「WhatsApp credentials」，佢會教你點樣去攞 API Key 同埋設定電話號碼。全程有指引，唔駛由頭摸索。設定完所有項目，右上角個「Publish」制就會變成可用，撳一下就正式啟動你嘅管家。掂。

第二招：AI 幫你砌 唔代表你唔洗學

如果你想了解每一步點運作，可以手動砌。呢個過程會令你明白點解 n8n 咁靈活，之後你就可以自己改、自己加功能。Pro Tips：用 AI 砌咗 workflow，花少少研究吓 AI 點樣砌。撳入每個 node 睇吓佢設定咗啲咩、點樣將上一個 node 嘅 output 傳落下一個 node、條件點寫，呢個係你學習 n8n 最快嘅方法之一。點解要學 AI 砌嘅，而唔學啲 Template？果啲對新手嚟講可能太複雜。好多 template 會包含十幾個 nodes、處理好多唔同情況、加埋 error handling，你一開波睇會好亂。

AI 砌嘅唔同，佢係根據你嘅簡單需求度身訂造，只會包含你需要嘅 nodes，結構清晰易明。例如你想「摘要 Email 發去 WhatsApp」，AI 就只會砌三至五個 nodes，你一眼就睇得明成條 logic。你睇多幾次 AI 點砌，就會明白點解要咁連、點解要加呢個 node。之後你就可以自己改、自己加功能，甚至去睇 Template Library 入面啲複雜都唔會怕。不過，仲有第三招。

第三招：站在巨人肩上 直接用 Template

你可能留意到有好多現成 Template？如果你嫌自己砌麻煩，前人已經幫你整好咗好多常見 use cases，包括每日天氣報告、用 AI 摘要 Email、自動生成 YouTube 影片章節等等。​呢啲 Template 全部都係 community 貢獻，但對新手嚟講可以好複雜。同樣係管理 Email，但可以入面有幾個 sub-workflows、十幾個 nodes、有 Markdown conversion、同 Telegram 通知 。如果未熟，真係會睇到眼花。​

所以我建議：先用 AI 砌過一次、手動砌過一次、明白基本 logic，再入去睇 Template，學吓人哋點樣處理更複雜嘅情況，例如 error handling、多重條件分流、點樣攝人手 approval 等等。不過 Template亦唔難用、跟住 setup checklist 逐個 credential / 授權填就得。唔洗由零開始，站喺巨人肩上更快。但記住，唔好未學行，先學走。

你已經係 Automation 玩家

恭喜你！你啱啱親手（或者用 AI）整咗一個自動化加 AI 結合嘅程式。呢個例子雖然簡單，但你試諗下：如果將 Email 換成客戶填 Google Form？如果將 WhatsApp 換成 Slack 通知成個 Team？如果將 ChatGPT 換成自動分類同分派工作？原理係一模一樣。一旦你試過成功令電腦自動做嘢，你會發現身邊所有重複嘅工作，其實都係一條條未砌好嘅 workflow。

講到呢度，可能有人會問：「Eric，你啲文係咪用 AI 寫出嚟？」
答案係：Yes and No。

而事實上，好多人啲文都係用 AI 寫。下次會講呢個問題，Eric 唔會係第一個，亦唔會係最後一個講呢樣野嘅人。我哋睇吓 Written WITH AI（AI 幫你做）同 Written BY AI（AI 代你做）有咩分別，懶同聰明條界點樣劃。