100 個完美構思 然後冇然後
有朋友問我個 “Write with AI” 系列幾時寫埋佢，佢追緊。事實上，我個腦入面已經寫咗冇 50 都有 100 次，包括沖緊涼、跑緊步、半夜瞓唔著嗰陣。覺得自己係莎翁上身 To Pay or Not To Pay, This Is The Question。
當腦入面已經由宇宙大爆炸推演到人類滅絕，完美無瑕，隨時係諾貝爾獎級數。結果？埋到機，打開個 Word，打咗兩隻字，然後畫面出現嘅係其他好似關事嘅文章，又或者個人走咗去執房，又可能係洗衣機搞緊機衫。本來我想寫埋個 Part 4，由 Bloom’s Taxonomy 睇到創造力同「快樂激素」Dopamine（多巴胺）有咩關係，到ADHD 患者嘅思維模式，經過一輪 Mind Wandering（心神漫遊），然後就出咗個 3.5。但係，呢到有件事錯咗。
多巴胺：快樂激素？Don’t Get Me Wrong
神經科學家 Robert Sapolsky 咁講，人類 90% 行為都唔係意識決定，而係習慣、荷爾蒙同環境驅動反射。即係，你以為自己做緊決定？其實好多時係啲激素幫你做緊決定，你會以為自己「唔專心」、「意志力唔夠」但實際上，呢個係人腦嘅原廠設定。
Dopamine，網上最常見嘅版本係快樂激素。聽落好合理，但很抱歉，其實係錯。多巴胺同快樂一啲關係都冇，佢只係負責「追逐」嗰種感覺。Andrew Huberman 講得好直白：多巴胺唔係 reward（獎賞），係 anticipation（預期）。換個講法，你想買件嘢嗰陣，多巴胺會升高；當你買到手，會即刻跌返落嚟。你唔係要買，你係要「想買」。
Dopamine 同 ADHD 有關？
先講下 Dopamine 水平低嘅狀態，就係你成個人變成「慳電模式」：無動力、無感覺、兼且個腦唔轉，因為 anticipation 太低。而呢個，正正係 ADHD 嘅日常。而多巴胺系統嘅運作方式唔同，會直接影響動機、專注同執行呢幾個環節。好多人以為 ADHD 性格懶，但 2025 年最新嘅研究指出，其實係個 Effort-Based Decision Making（基於努力的決策）問題。
用人話講就係：ADHD 個腦嘅多巴胺系統對努力成本特別敏感，有傾向 overestimate the cost of effort（高估困難度）。就會出現一個好有趣嘅現象，你可以腦入面諗到好多嘢（成本低），但一去到要真係落手做，個腦就會話「呢單嘢太貴，唔抵做」，甚至有可能出現 Analysis Paralysis（分析癱瘓。呢個解釋咗一個對 ADHD 好正常嘅現象：可以為咗一個小任務（例如：清理 download folder）超投入，但對住最重要嗰件事反而啟動唔到？因為個腦覺得「前者回報快、成本低；後者成本高、回報慢」。
進入 ADHD 思考領域
而係 2025 年 11 月，Radboud University 針對 750 個人進行測試研究，發現 ADHD 特質越明顯嘅人，，Divergent Thinking（發散性思維）嘅能力越高。Divergent Thinking 係指由單一起點產生多方向、多可能性嘅思考模式 ，亦係創造力嘅核心機制。創新從來唔係憑空出現，而係 Remote Association（遠距離聯想）將原本無關嘅概念重新組合，產生新嘅可能性。
研究發現 Mind Wandering 原來分兩類：「刻意」同「自發」，對某啲人嚟講，「自發」更常見，好似一個喺背景運行嘅程式，但你未必控制到佢幾時開，而呢種「背景運算」正正係好多創意工作者嘅秘密武器。點解成日話靈感喺「沖涼（請自行填充）」嗰陣出現？因為當你停止刻意思考，你個腦會進入自發神遊模式，亦係 Divergent Thinking 最強嘅時候。然後「叮」一聲，個靈感就出現。所以，問題從來唔係「走神」本身，而係之後點樣收返條線。
AI 可以幫你搭棚
2025 年有篇針對 ADHD Programmer 同 Writer 嘅研究，用咗 Cognitive Scaffolding（認知棚架）呢個詞。棚架嘅作用從來唔係代替你起樓，而係令你「起到樓」。研究發現生成式 AI 對 ADHD 嘅最大幫助唔係寫 Code 或寫文，而係 Task Decomposition 任務拆解。
呢篇文，係我坐喺海邊寫初稿。夜晚十點幾，風有啲涼，浪聲好規律。作為一個資深 ADHD 患者，我學過無數 Productivity Hacks：番茄鐘、GTD (Getting Things Done)、Accountability Partner，仲有好多。全部都有用，但全部都唔夠。點解？因為呢啲方法都係假設你已經「落到地面」，只係需要幫手行快啲。但呢啲方法，其實好似叫緊一架直升機去用車軚。
有人話 Eric 唔接地氣，可能係真嘅。因為 ADHD 嘅腦運作方式唔同，擅長 Divergent Thinking 而唔係 Convergent Thinking，需要外部工具去幇手。而 AI，就係個錯嘅工具。下一次，Eric會講點樣用 AI 配合呢種思維模式去做創作。呢篇係關於停低，重新理解自己個腦點運作。如果你都係嗰種「腦內戲好精彩，但落手就散」嘅人，你需要嘅可能唔係更大嘅意志力，而係一個幫你拆細 task 嘅工具。
Eric C房解密 