你用 AI 寫嘢，定係 AI 用你出嘢？(Part 1)

「Eric，你啲文係咪用 AI 寫？」Yes and No。

重點唔係「有冇用 AI」，而係點樣用。係你用 AI ，定係 AI 用你？你可能會話：「梗係我用 AI 啦，Prompt 係我打嘅，Enter 係我㩒嘅。」但很抱歉，真相可能相反。當你盲目接受 AI 嘅 output、放棄自己嘅判斷，你已經唔係 user，而係工具、一個幫 AI「確認」同「發佈」嘅工具。咁，呢條界線點樣劃？「Written WITH AI」同「Written BY AI」有咩分別？Eric 同大家從人類認知角度去睇下人同 AI 嘅「分工」。

幾十年嚟，人類點樣學習同思考，大概可以用 Bloom’s Taxonomy（布盧姆分類學）。呢個框架裡面，人類認知範疇被分為六種：記憶、理解、應用、分析、評估、同埋創造。AI 時代，有啲嘢可以放手俾 AI，有啲嘢你都係應該自己做。今日先講最底兩層：記憶同理解。先講結論，呢兩層AI 已經做得比人類好太多太多。而你要做嘅，就係認清現實，然後將精力放喺更高嘅層次。

記憶呢家嘢認輸啦，人腦唔係攞黎記嘢架

Remembering（記憶）喺底層：記住資料、背誦事實。以前讀書，你要死記：年份、公式、人名、定義，記唔到咁多？放心，考完就自然會還返晒俾老師。不過唔緊要，下正如愛因斯坦冇講過：Education is what is left when all the facts are forgotten，呢啲先係教育。大腦容量有限、速度又慢、仲會自識 delete。​大家都應該試過，想知某個歷史事件嘅細節，以前你要去圖書館、Google、搵資料、做筆記。依家？AI 即刻出晒時間線、人物、影響、相關事件俾你。AI 完勝。你唔需要再同機器鬥記憶，因為你輸硬。

Quick Question：你放棄咗呢個底層，係咪等於你可以唔記嘢？唔係。你仍然要知道邊度搵資料、資料係咪可靠、自己需要咩資料。呢啲唔係單純記憶，而係更高層次嘅能力，遲啲會講到。依家你只需要「記住」一樣嘢：放手俾 AI　啦，唔好再浪費腦力去死記硬背 。​

講完記憶，講理解速度，人類又輸

第二層係 Understanding（理解），明白意思、解釋概念、總結內容。以前你要睇一份 50 頁嘅報告，花兩個鐘逐頁睇、做筆記、理解重點。你要學一個新概念，睇書、睇片、問人，慢慢先明。今時今日，AI 可以幾秒鐘 summarize 一份 100 頁報告，抽晒重點俾你。你 input 一篇論文，佢即刻解釋晒入面所有技術詞彙、理論框架、核心論點。你問佢一個複雜概念，佢用唔同方式解釋，直到你明為止。​呢一層，AI 都係完勝。佢理解得快過你、全面過你、而且可以用唔同角度、唔同深度解釋。你唔需要再花幾個鐘去「理解」一樣嘢嘅基本意思，AI 幾秒就做到。

你仲有咩用？

睇到呢度，有冇人咁諗？「AI 記得快過我、理解得快過我，我仲有咩用？」傻豬黎架，你仲好有用！但個關鍵係：你唔應該再喺呢兩層同 AI 鬥。你應該將 AI 當成一個助手，幫你處理啲粗重功夫，而你就專注喺更高層次嘅嘢。以前，你可能要花一日時間睇報告（Understanding）、記低所有數據（Remembering），先可以開始做決策。而家 AI 幫你 10 分鐘做晒呢兩樣嘢，你就可以將時間用喺應用知識、分析問題、作出判斷。咁樣唔係偷懶，而係聰明。​但要記住：你要知道自己要咩資料、要理解咩概念。如果你連自己想點都唔知，淨係叫 AI「幫我搵啲資料」、「幫我理解呢樣嘢」，你就唔係用 AI，而係畀 AI 牽住個鼻。呢個就係「Written WITH AI」同「Written BY AI」嘅第一道分水嶺，有冇主動性。

實際例子：寫文blog 講「香港網絡安全趨勢」

當Eric 要講「香港網絡安全趨勢」，BY AI 嘅做法可以係：「幫我搵啲香港網絡安全嘅資料」，AI 出咗 10 篇文，唔駛睇，直接叫 AI「總結呢啲文章，然後寫篇文」，AI 出咗篇文，搞掂。你唔知自己講咩、資料係咪可靠、甚至有冇重點。你，只係 AI 嘅搬運工。

WITH AI 嘅做法？我想講邊幾個 trends？讀者最關心咩？我需要咩 source？然後你 prompt：「幫我搵今年香港網絡安全嘅官方報告、新聞、案例，重點係 ransomware 同 AI security」，AI 同樣出咗 10 篇文，你自己睇返啲 source，揀咗 5 篇想用。然後叫 AI「根據呢 5 篇，出個框架，包括 trends、案例、建議」。AI 出框架，再調整同補充觀點。AI 幫手寫（重點：佢打字快我太多），人去 verify 資料、判斷重點、加入專業見解。

分別係你有主動性、有方向、有判斷，AI 只係幫你加速，你仍然控制緊成件事。

放手，但唔好失控

今日嘅結論好簡單：記憶同理解呢兩層，放手俾 AI。唔好再浪費時間死記硬背，AI 做呢啲嘢快過你幾十倍。你應該將時間同精力放喺更高層次嘅認知活動。​記住：放手唔等於失控。你要知道自己要咩資料（方向）、點樣判斷資料係咪可靠（標準）、點樣將資料變成有用嘅知識（應用）。呢啲係更高層次嘅能力，我哋之後會講：Applying（應用）同 Analyzing（分析）。AI 仍然好勁，但開始出現限制。你要開始留意。

Are you ready?